2014 јылдаҥ бери тергеебисте Алтай тилдиҥ кӱни бийик кеминде темдектелип башталды. Мындый баштаҥкайды Алтай Республиканыҥ Эл Курултайы 2012 јылда улу алтай бичиичи ле поэт Лазарь Васильевич Кокышевтиҥ чыккан кӱнине учурлай эткен.

Бӱгӱн, мындый јаан учурлу байрамдык кӱнде, уткуулду сӧстӧриле Алтай Республиканыҥ Башчызы, Алтай Республиканыҥ Башкарузыныҥ Председатели А.В.Бердников ло Алтай Республиканыҥ Эл Курултайыныҥ Председатели В.Н.Тюлентин баштанат.

Кӱндӱлӱ jерлештер!

Акту кӱӱнистеҥ слерди Алтай тилдиҥ кӱниле уткуп турубыс!

Алтай Республикада Алтай тилдиҥ кӱни ӱлӱрген айдыҥ 20-чи кӱнинде ӧдӱп турганы сӱрекей jаан учурлу, бу кӱн—а лтай поэт, бичиичи, баштапкы алтай романист, алтай литератураныҥ классиги Лазарь Васильевич Кокышевтиҥ чыккан кӱни.

Ак-jарыкка чыкканынаҥ ала бала ада-энезиниҥ куучын-эрмегин угуп, сӧстӧрди оҥдоп, бойы куучындап баштап jат. Оноҥ ары чыдап, эҥ jаан байлыкты, калыктыҥ jебреннеҥ арткан энчизин–тӧрӧл тилиниҥ jаражын аайлап, кеен ле чечен тилдиҥ jажыттарын бойына ачып, ӧзӧк-буурына алынат. Кижиниҥ jӱрӱми тӧрӧл тилиле ӱзӱлбес колбуда. Улу поэт Расул Гамзатовтыҥ айтканыла: «Эртен тӧрӧл тилим jоголор болзо, бӱгӱн меге тыным да карам эмес».

Алтай тил–ол калыктыҥ ойгор кӧгӱс-байлыгы ла jаандарыстыҥ jаанчыкка салып берген энчизи. Алтай тилди чеберлеп корыырында ла ол ичкери ӧзӱм алынарында кажы ла кижиниҥ jӧмӧлтӧзи тузалу. Jайалталу ӱлгерчилердиҥ, бичиичилердиҥ, шиҥжӱӱчилердиҥ, ӱредӱчилердиҥ ле оноҥ до кӧп улустыҥ эрчимдӱ jайаан ижи учун алтай тилдиҥ келер ӧйи jаркынду болор деп иженедис.

Тилге чебер баштанып, тереҥжиде шиҥжӱлеп, учурын билбес сӧстӧрди ӱренип эмезе ундылганын орныктырып, бу байлык энчини корып jӱрери учун бис, эмдиги ӧйдиҥ улузы, келер ӱйелер алдында каруулу.

Алтай тилди чеберлеп ле корулап, оны ӧҥжӱдип jӱрген улуска ончозына алкыш-быйанысты айдадыс. Слерге ончогорго бек су-кадык, ырыс-кежик кӱӱнзейдис, айыл-jуртыгар амыр-энчӱ турзын, алтай тилис ле республикабыс jаранып ӧссин!

Алтай Республиканыҥ Башчызы, Алтай Республиканыҥ Башкарузыныҥ Председатели А.В.Бердников

Алтай Республиканыҥ Эл Курултайыныҥ Председатели В.Н.Тюлентин